parusang kamatayan

Panahon na bumangon, mga kababayan

Matagal na tayong nagbubulag-bulagan

Buksan natin ang ating mga mata’t pagmasdan

Ang tunay na kalagayan ng ating bayan

Patayan dito, korapsyon doon ang araw-araw na balita

Dahil sa droga, napakaraming buhay na ang nasisira

Biktima lahat – mahirap, mayaman, matanda man o bata

Walang mabuti itong naidudulot sa ating kapwa

Kaya naman tinutulak ng ating pamahalaan

Isabatas muli ang parusang kamatayan

Isang desperadong mosyon para krimen ay mabawasan

Ngunit ito ba ay ang tamang paraan?

Kapag nagkamali ba ang tao ay wala na siyang halaga?

Tandaan, ang tao’y hindi lamang katawan; tayo’y may kaluluwa

Kapag may karahasang nangyari, tayo ay biktima

Ngunit ang pagpatay sa mga nagkamali ay hindi hustisya

Halaga ba natin ay parang kagamitan?

Kapag may problema ay itatapon na lang sa basurahan?

Tao tayo, may pagkakamali, sadyang may kahinaan

Pero kahit ganoon, kaya natin magbago basta tayo’y matulungan

Tulong-tulong tayo patibayin ang sistema ng hustisya

Upang maranasan natin ang seguridad ng bawat isa

Tanging parusang kamatayan lamang ang dapat maibasura

Sa usapin ng buhay o kamatayan, wala tayong karapatan magdikta