BAGYO!!

Bagyo!
John B. Juat

Sunod sunod ang pagpasok ng mga bagyo
Walang tigil na ulan na tila isang dilubyo
Napakarami ang mga pamilya at lugar na apektado
Milyon milyon ang halaga ng pinsalang dulot nito

Kay tindi ng hampas ng alon sa baybayin
At napakabilis rin ng pagtakbo ng hangin
Ang pagguho ng bato at lupa ay possible rin
Marami ang pwedeng mangyari, nakakatakot isipin

Ang mga bagyo, malaki ang dulot nitong mga pinsala
Dapat lang na parati tayo alerto at nakahanda
Huwag na sana maulit ang mala-Ondoy na ulan sa ating bansa
Dahil tayong lahat, mahirap o mayaman ay kawawa

Subalit may namataang sama ng panahon
Mas malaki at mas malakas sa bagyong Ondoy at Falcon
Mabilis ang hangin; malaki ang enerhiyang naipon
Nakakatakot pero patungong Pilipinas ang direksyon

Ito ay ang bagyong RH bill at diborsyo
Na nagbabantang sirain ang pamilyang Pilipino
Babaguhin nito ang pag-uugali at pag-iisip ng bawat tao
Wawasakin nito ang pag-asang ang bansa ay aasenso

Tuluyan na sana mawala ang bagyong RH at diborsyo
At ibasura na kaagad ang mga panukalang ito
Dahil napakatindi ang pinsalang ating matatamo
Kung mawawasak ang pamilyang Pilipino