RH BILL, HINDI PARA SA ATING BAYAN

RH BILL, HINDI PARA SA ATING BAYAN

ni: John B Juat

Bilang isang anak at isang mamamayan

Ng ating minamahal na bayan

Mayroon akong mumunting kahilingan

Sana, kahit papaano, ako ay mapakinggan

Tingnan natin mabuti ang kapaligiran

Ano ba ang nakikita? Ano ang namamasdan?

Marami ang naghihirap, nakararanas ng kagutuman

Bakit kaya hindi parin natin sila matulungan?

Ang ating mga kapatid, ano ba ang kanilang kalagayan?

Ano ba talaga ang kanilang tunay na kailangan?

Edukasyon, pagmamahal, kalusugan at tirahan

Iyan ang dapat natin ibigay. Lahat naman ay may karapatan

Sobra na ang ating pagbubulag-bulagan

Halata naman, nararapat na sila ay ating tulungan

Para isang araw, maiahon sila mula sa kahirapan

At mabigyan sila ng magandang kinabukasan

Ngunit bakit ang RH bill patuloy na ipinaglalaban?

Hindi naman ito ang solusyon, marami naman paraan

Hindi naman nito kaya punuin ang kanilang mga tiyan

Ang tanging tinuturo nito ay maling kamalayan

Purkit malaki ang pamilya, ito na ba ay kasalanan?

O sadyang ang sarili lamang ang laman ng isipan?

Isipin natin ang kapwa natin, sila ay dapat protektahan

Hindi dungisan at mas lalong sirain ang kanilang pangalan

Ano ba ang mangyayari kung ating turuan

Ng tungkol sa seksualidad ang ating kabataan

Pamilya ang dapat magturo, huwag natin sila pangunahan

Dahil disgrasya kung ang impormasyon ay mali ang pinaggalingan

Ano na ang mangyayari sa mga kababaihan?

Sinisira ng RH bill ang kanilang katauhan

Sila ay may dignidad, hindi naman sila kagamitan

Sila ay dapat lamang na alagaan at suportahan

Itinuturo din ang pag-abuso sa ating kalayaan

Pati na rin ang sobra at maling kaalaman

Itinuturo na ang pagbubuntis ay isang sakit na dapat iwasan

Ang buong bill na ito ay puro kasinungalingan

Kung susuriin natin ng mabuti ang nilalaman

Hindi naman talaga ito ukol sa kalusugan

Hindi ito nakabubuti para sa karamihan

Kaya sana… ang bill na to ay itapon na sa basurahan

Marami na ngang problema ang kailangan solusyonan

Huwag na natin intaying lumala, huwag na natin dagdagan

Bigyan natin sila ng edukasyon at gumawa ng kabuhayan

Para sila’y makaipon kahit mumunting puhunan

Kung ang habol ng ating bayan ay kaunlaran

Ang ating kapwa mahihirap hindi dapat pinababayaan

Huwag natin isakripisyo ang moralidad para sa kayamanan

Kung hindi, ang Pilipinas ay walang patutunguhan